Pagkilala sa Kaugalingon kag ang Matuod nga Pag-alagad

Sa mga proyekto, programa, negosyo ukon bisan ano nga buluhaton sang tawo nga luyag niya manginmadinalag-on, importante ang pag eksamen ukon ang evaluation. Kinahanglan nga kilalahun niya ang mga nagabululig kag ang mga naga upang nga mga realidad (strengths and threats). Ang pagkilala sini magahatag sa iya sang mas nagakaigo nga direksyon kung paano niya atubangun ang sitwasyon agud masiguro ang kadalag-an nga iya ginahandum. Diri natun Makita ang relasyun sang pagpahuway kag pag obra, sang pagplano kag pag buhat, sang pagdulog kag pagbira-bira.

Sa aton Ebenghelyo, makita man naton ang pagbalanse sini nga mga realidad, ang serbisyo ni Kristo sa mga naga kinahanglan ayuhon sa ila mga balati-an kag ang iya pagpangita tion nga makapakig isahanon. Ang kadalag-an sa aton ginaobra, ang balatyagon nga nakabulig kita kag kinahanglan kita sang iban, ang punto nga may sarang kita mahatag sa iban isa ka balatyagun nga nagapuno kag nagalipay. Isa ka manami nga balatyagun nga sa dalayon sarang man makapatalang tungod kay sarang ya kita buyukon sa sini na lang nga manami nga balatyagon kag indi na sa kaayuhan sang iban. Ang una nga pagpasulabi sang kaayuhan sang iban sarang magliso kag mangin makaugalingon nga nagapuno sang personal nga kinahanglanon. Diri na nagasulod ang pagkaimportante sang tion nga makapagpakig- isahanon kag makapangamuyo. Mas kinahanglan naton diri ang pangamuyo nga naga pamati, naga-usisa kag nagapadalum sa kaugalingon kung ano gid ang labing importante sa aton, ang kaayuhan sang iban ukun ang aton kinahanglanun nga mayo nga ngalan ukon balatyagun, ukon para wala na sing masabad bisan pa nga indi husto ang ila ginapangayo. Sa sini nga pag-usisa kag pagpamati mas makilala naton ang aton kaugalingon kung sa diin nagahalin ang aton motibasyon, kung kamusta na kita, kung kuntento gid man bala kita, kung ano pa ang kulang nga aton ginapangita. Diri, ang pangamuyo nga naga pamati kag naga-eksamen sang kaugalingon makahatag sang mas husto nga direksyon kag gani tuod nga nagapuno, nagapatubo kag nagahatag kalipay nga madalum kag nagadugay. Kay posible nga naga-alagad kita kag malipayon kita, pero kung indi naton makita nga ang aton gali pagbulig nagahalin sa aton kinahanglanon (it is our personal need to help people), ini nga kalipay hapaw kag nagadugang pa gid sang pagkagutom kag pagka-uhaw sa sina nga kinahanglanon. Gani ini indi matuod nga kalipay. Pero ang tawo nga nagiyahan sang pangamuyo nga nagapamati sa pang-agda sang Diyos kag pagkilala sa kaugalingon, may kalipay nga bisan indi tama ka tunog pero nagadugay kag may bunga nga nagahatag kahulugan kag paghidaet.

Pangayuon naton ang grasya nga mabalanse naton ang aton pag-obra, pagserbisyo kag ang aton pagpangamuyo kag pagpamati sa aton kaugalingon kag sa Diyos.