by Evelyn B. Nervato
Fe Marina S. Siacon
Nagkinarankaran ang tanan, nagalukdo sang mga gamit, nagaguyod sang mga sapat, sa paglikaw sa isa ka daku nga sunog nga natabo sa Barangay Bakhaw sang nagligad nga Pebrero 23, 2009. Nag-umpisa ini mga alas kwatro sa aga, nagikan sa kandila nga ginsindihan bangud sang brown-out. Diri sini nga balay nag-umpisa ang sunog. Madamo nga mga pamalay ang nagkalasunog lakip na diri ang mag-asawa. Malapad ang ginlamon sang kalayo humalin didto sa tangkulan sang taytay (taytay nga nagaangot sa Jaro market) pakadto sa old chapel nayon. Maayo lang kay ining old chapel ukon kapiya wala man masunog, pero sa kilid kag likod sini naupos gid. Diri nag-untat ang kalayo. Napalong ang kalayo sa bulig sang mga bombero, kag subong man sang mga tao mismo sa sini nga barangay nga wala nila ginbale ang kabudlay sa paghakot sang tubig gikan sa bomba. Masigbitbit lang sang ila balde.
Pagkatapos sang sunog, gintawgan ni Bishop Alminaza ang Pastoral Service Ministry sa pagkadto sa nasunugan sa pagpangungisa sang halit nga natuga sa mga tao upod kay Fr. Andy. Si Msgr. Oso nagpadala man gilayon sang onse ka sako nga used clothing kag mga tinapay sa kaalwan sang Angelina. Nagpadala man ang parokya sang materiales (subong abi sang mga pusog, kawayan, lansang, amakan kag galvanized iron) bulig sa pagpatindog sang balay sang mga tao nga nasunugan.
Sa sini nga hitabo, diri naton masaksihan ang espirito sang bayanihan. Ang mga tao sa sining magamay nga katilingban naghugpong, nagbululigay, wala ginbale ang daku nga kabudlay mabuligan lang sang tanan ang pagtapna sang kalayo. May ara man nga nagasiling nga daku nga milagro ang natabo kay ngaa nga sa balay gid sang Mahal nga Birhen nag-untat ang kalayo.
Nagahibi nga nagapanaysayon ang isa ka nanay nga nagakongkong pa sang iya baby. Siling niya: “Ginbuligan gid kami sang Mahal nga Birhen sang Medalya Milagrosa. Nagapati ako nga ginhumlad niya ang iya manto sa paghatag proteksyon sa amon. Milagrosa gid siya matuod. Kabay pa nga matandog man ang mga tagipusuon sang mga tao kag maghatag man sing kabilinggan sa Mahal nga Birhen paagi sa pagpangadi sang Santo Rosario.” May isa man didto nga naghambal, “Sang pagbaha wala man ang Mahal nga Iloy maano. Nag-untat ang pagdalom sang tubig sa iya nayon.”
Pagpuas sang kalayo, nagkadto ako sa old chapel, didto man gihapon ang Mahal nga Iloy, sa gihapon nagatan-ay sang iya mga kamot, handa sa pagbulig sa iya mga kaanakan. Nagpasalamat ako sa iya kay ako man nagapati nga tungod sa iya bulig wala maglapta ang kalayo.
kinanglan gid man kon kis a nga matabo ang isa ka bagay ukon sitwasyon para mabugtawan kita kag makita kong ano ang nagakatabo sa palibot ta
ReplyDelete