Determinasyon

May isa ka Beterano sang inaway sa Vietnam nga nagsulat sa iya mga ginikanan sang iya malapit na nga pag-abot. Sa iya sulat, ginhambal pa gid niya nga may upod sia nga isa ka abyan nga may isa lamang ka mata, isa ka butkon kag isa ka tiil nga nabilin sanglit sia isa ka biktima sang landmine. Nagsabat ang iya ginikanan nga nakunyag na gid sila sa pagpaabot sa iya, apang indi nila mabaton ang iya abyan tungod mangin dugang ini nga huol sa ila puluy-an. Wala sila sing nabaton nga sabat gikan sa ila anak. Pagkaligad sang isa ka bulan, may mga pulis nga nag-abot sa ila balay kag nagpangabay sa ila nga mag-upod sa hospital sa pagkilala sang isa ka patay tungod ila puluy-an ang nakita sa pitaka sang biktima. Sang buksan nila ang tabon sang patay, ini sia may isa lamang ka mata, isa ka butkon, kag isa ka tiil nga nabilin. Ang ginbilin nga sulat sang biktima nagasiling: “Indi na ako ginabaton sa inyo puluy-an!” Ining biktima gali amo ang ila kaugalingon nga anak!

Ang pagsikway, isa sang mga negatibo nga eksperyensiya sang tawo tungod ginaupdan ini sang kasakit, pag-antus kag kamatayon!

Ang aro sang panahon ni Jesus “ginkabig nga katulad gid kalain sa kamatayon kag ang pagpaayo sang aro ginapaanggid sa pagbayaw sang isa ka tawo gikan sa kamatayon.” Nahibaluan ni Jesus ini nga balatyagon sang pagpalapit sang isa ka aruon sa Iya. Nagbatyag Siya sang daku nga kaluoy gani Iya ginpaayo ini sa gilayon. Indi lamang nga “ginhimo ni Jesus ang Iya sini panit nga mangin makinis liwat” apang ang mas importante, ginbalik sia sing bug-os sa katilingban nga “nagsikway” sa iya.

Ang pagpaayo sang aruon nga tawo nag-abot lamang bilang bunga sang isa ka AKTO SANG PAGBATON k ni Jesus. Paagi sa pagdala pabalik sang sinikway sa kabuhi sang katilingban, luyag ni Jesus ipahibalo nga wala sing bisan isa nga dapat tabugon, ukon sikwayon gikan sa bag-o nga panimalay nga Iya gintukod.

Bilang sumulunod ni Kristo, ginahangkat kita sa pagsunod sang panimuot ni Jesus sa mga ginasikway; pangitaon naton ang pagsugataay, indi magkahadluk sa pagtandog sang tanan nga nagakinahanglan sang bulig (makasasala, mga tawo nga mabudlay pakigbagayan, mga nagatagumatayon, biktima sang AIDS, etc). ginatudluan kita ni Jesus nga kinahanglan magpalapit kita sa ila, pabatyagon sila sang kainit sang paghigugma, tungod amo lamang ini ang paagi sa diin ining nga “masakiton” makapanumbalik sa KABUHI!


REV. FR. JESUS GLOFEL MANAAY
ARCHDIOCESAN COMMISSION ON CATECHESIS AND CATHOLIC EDUCATION
Pius XII Catechetical and Pastoral Formation Center
Jaro, Iloilo City