Kay Sin-o kag Diin Ako Masugod? SA PAGHILIUSA ARA ANG KABASKOG…

Kay Sin-o kag Diin Ako Masugod?
SA PAGHILIUSA ARA ANG KABASKOG…

“Kari kamo ang tanan nahanda na
Sa punsyon sang paghigugma
Maghi-ugyon nga may kasadya
Sa pagkabuhi sang bug-os nga paghiliusa”

Ini una nga mga dinalan sang amba sang ikatlo nga Sinodo Diosesano sang Jaro. Sa ambahanon, mabasa naton nga “ang tanan nahanda na sa punsyon sang paghigugma…” apang pamangkuton naton ang aton kaugalingon: Ako bala bahin sinang punsyon sang paghigugma? Ako bala handa sa pagbugras sang akon makinaiya-iyahon nga pamatasan kag makig-ugyon sa mga katapo sang akon panimalay, sa akon mga kasilingan tungod kay sila, pareho ko, nahamtang o nagapuyo sa isa lamang ka komunidad? Ako bala handa sa pagtan-ay sang akon mga kamot sa akon mga kaupod sa akon ginaobrahan? Ako bala handa makig-uli o makipag-abyan sa akon mga kaaway?
Ang paghiusa nagasugod sa aton mismo kaugalingon. Ang matuod nga pagpakig-angot mahimo lamang kon kita wala sing pagpakuno-kuno… kon ano ang aton ginapanumdom amo ang aton ginahambal; kon ano ang aton ginapabutyag amo ang aton ginabuhat; kon ano ang aton ginapanumdom kag ginapabutyag aton ginakabuhi… bangod kay katapo kita sang isa ka Kristohanon nga panimalay nga katapo man sang isa ka katilingban nga may isa ka direksyon, may isa ka misyon, may isa ka panan-awan padulong sa bug-os nga paghiliusa.
Sa paghiliusa ara ang kabaskog. Madamo ang mahimo/mabuhat kon may paghiliusa. Kami makapanaksi sini sa amon mga gin-agihan sang ginpatigayon ang pagpangkadto namon sa mga barangay nga ginhugpong sa siyam ka mga zona nga nasakupan sang mga masunod nga mga barangay:
Zona I San Vicente, Lourdes Jalandoni, Lourdes DB
Zona II Benedicto, Luna
Zona III Democracia, Simon Ledesma
Zona IV Tabuc Suba Proper, Tabuc Suba Ilaya
Zona V Ma. Cristina, San Roque
Zona VI Libertad, Fajardo, Arguelles
Zona VII Taytay Zone II, Cuartero, Calubihan
Zona VIII Taft North, Bakhaw
Zona IX Desamparados, CC El 98, Seminario

Sa wala pa matalana ang adlaw sang pagsugod sang pagpanglakaton sa mga zona upod sang imahen sang Nuestra Señora de la Candelaria, may mga pagsinapol nga ginhiwat sa diin ginplanohan sang Committee on Worship upod kay Fr. Andy kag Fr. Philip ang mga buluhaton kag mga tawo nga magapatigayon sini.
Duna sa pamatasan sang mga tawo ang pagtililipon bangod kay ang tawo “social being”; apang ang paghugpong sang mga ini sa isa ka balaan nga tinutuyo isa ka mabudlay nga hilikuton. Ang madamo nga mga tawo sa zona nga nag-abi-abi sang pag-abot sang imahen sang aton Mahal nga Patrona amat-amat nga nagkaladula o nangindulaan sang ang tagpatigayon sa pagpaambit nahanungod sang mga hilikuton sang isa ka gamay nga katilingban nagsugod sa paghambal. Kami nga grupo halin sa katedral nakapamangkot: Diin ang ila “commitment”? Tubtob diin lang kag ano lang ang ila masarangan nga ihatag sa katilingban para mabalay ang isa ka paghiliusa?
Natigayon ang siyam ka adlaw nga pagsugat-pagdul-ong sang imahen sang Nuestra Señora de la Candelaria, pagpakig-ambit bahin sa urna kag “Ang Gamay nga Kristianong Katilingban: Alagyan Padulong sa Bug-os nga Paghiliusa,” pagpartisipar sa Santos nga Misa, salamat sa paghugpong sang mga masunod, may ulan man ukon wala:
Fr. Andy Esperancilla Fr. Philip Sinco
Fr. Macky Sortido Bp. Gerry Alminaza,D.D.
Fr. Caloy Noquez Fr. Richard Daulo
Lourdes Prudente Remy Mationg
Evelyn Jimena Monico Alitao
Princess Descalsota Louie Vi Vergara
Ludy Alconga Virginita Vergara
Annabelle Guevara Jervin Vinzon
Jerly Docdocil Richard Camilotes
Neneng Siscar Darlee Estribo
Evelyn Nervato Vicente Gonzales
John Cloyd Pahila Kirby Guevara
Harvey Guevara Kate Sevilla
Dolores Pahila Felma Bering
Jennifer Addun Ione Espartero
Christopher Villa Paulo Pasquin
Lourdes Villa Roseller Villa

Ang amon mga inagihan- masadya, masubo, kaulugot/kailinit- nagpatubo pa gid sa amon bilang katapo sang isa ka daku nga katilingban, ang Parokya sang Nuestra Señora de la Candelaria; apang ang mga masunod nga mga pamalangkutanon magapadayon sa pagpangita sang mga sabat nga dapat naton tanan-tanan panumdoman:
Ano ang akon bahin sa pagtukod sang isa ka gamay nga katilingban indi lamang sa akon panimalay kundi lakip na sa akon barangay?
Paano ako makabulig sa pagpalapnag sang Kristianong pagtuluohan?
Hamtong na bala ako sa akon pagtuo kag handa na bala sa pagpaambit sang paghigugma nga wala nagapaabot sang balos?
Kon ang tagsa-tagsa sa aton may kabalaka sa isa kag isa kag maghimo sang dapat niya himuon (sugod sa kaugalingon), indi malayo nga malambot/matigayon ang bug-os nga paghiliusa.