“Pagbag-o ni San Pablo sa tagsa-tagsa: Panghangkat sang Kaliwatan”

“Pagbag-o ni San Pablo sa tagsa-tagsa:
Panghangkat sang Kaliwatan”

Ano ayhan ang aton reaksyon kun sa aton paglagaw sa SM City ukon sa Robinsons upod sang aton barkada, isa ka desente kag ka-edad naton nga pamatan-on ang nagpalapit kag naghambal sang matunog sa aton atubangan, “Nag-abot na ang tion nga gintagna sang mga propeta sang una. Ang paghari sang Diyos malapit na gid. Gani maghinulsol kamo sa inyo mga sala kag magtuo sa Maayong Balita!” Ang laban nga reaksyon naton siguro amo ang mag-utoy-utoy sang kadlaw sa kaham-ot, pwede man nga talikuran naton lamang siya nga daw wala lang kita sang labot. Ano pa gid ayhan ang aton reaksyon kun ang ini nga hitabo masulit samtang kita nagakasadsad sa dalanun sang siyudad sa pagselebrar sang Dinagyang, ukon samtang nagatambay kag nagatagay kita upod sang tropa sa Smallville?

Nagsulod ining mga sitwasyon sa akon pensar samtang nagapamalandong ako nahanungod sa mensahe sang ebanghelyo naton subong nga Domingo. Ang Gino-o nagsiling sa tanan nga nagtambong sa iya pagwali, “Nag-abot na ang tion nga gintagna sang mga propeta sang una. Ang paghari sang Diyos malapit na gid. Gani maghinulsol kamo sa inyo mga sala kag magtuo sa Maayong Balita!” Sadto nga panahon, madamo ang natublag kag nagtuo. Mahapos para sa mga katawhan sang Galilea sadto nga panahon nga magpati kay si Kristo mismo ang naghambal sini nga mga tinaga. Indi man liwan nga bisan si Kristo na mismo ang naghambal sini, may iban man nga nag-utoy-utoy kadlaw sa iya, nagtalikod kag naghuring-huring nga siya buang-buang. Gani, indi gid ako magtingala nga-a amo ini ang posible naton nga reaksyon kun ang mga hitabo nga ginsaysay ko matabo sa aton sa sining kaliwatan sang kagamo kag kabudlay dala sang pagduwaduwa kag kahadlok. Para sa aton sa sining kaliwatan, labi na gid ang mga pamatan-on, ang ini nga pagpanghangkat wala na-angot sa konteksto sang aton kalibutan; daw isa ini ka makahalam-ot ukon imposible nga pagpanghangkat; kag kun sin-o man ang nakakita sa sining pag ganyat sa “paghinulsol” ukon “pagbag-o” ginatamay nga isa ka buangit. Sa aton pagpadayun sang sining sala nga pagtan-aw, amat-amat nga nagakadula ang pagkilala kag pagbaton sang presensya sang Ginoo sa aton pangabuhi.

Sa sining kahimtangan, mas nagakinahanglan kita sang isa ka propeta nga magatuytuy sa aton padulong kay Kristo. Sa aton pagselebrar sang kapiyestahan sang Pagbag-o ni San Pablo sini nga Domingo, aton pamalandungan ang kaangtanan sang pagpanghangkat sang ebanghelyo sa aton. Si San Pablo nagkabuhi sa isa ka kaliwatan sang kagamo kag kabudlay, madamo nga mga Kristiyano sadto anay iya ginpatay bangud sa ila pagtuo. Pero, sa tunga sini tanan, wala sila nagpangduwaduwa ukon nagkahadlok nga ipabutyag ang ila pagtuo sa kay Kristo – bisan pa ini katumbas sang ila kabuhi. Padayun sila nga nagpangamuyo bilang isa ka katilingban para sa pagbag-o. Kag ini nga dako nga pagbag-o gindala sang Pagbag-o ni San Pablo, kay siya nga sang una nagpangduwaduwa, subong, amo na ang nagdala sang kamatuoran, sang Maayong Balita sa mga kapungsuran.

Indi liwan nga amo ini ang aton kinahanglan sa pag-atubang sang pagpanghangkat sang kalibutan: ang pagpanghangkat sang matuod-tuod kag madalum nga pagbag-o; pagbag-o nga magadala sang Maayong Balita, indi lamang sa mga hentil, kung indi, sa mismo naton nga mga katilingban, sa aton pamilya, sa aton mga barkada, sa aton mga ka-eskwela ukon kaupod sa trabaho; indi na sa iban nga mga kapungsuran, kung indi, sa mismo nga mga lugar nga kita gatilipon sa mga ordinaryo nga mga tini-on.

Sa aton kaliwatan, dapat naton amat-amat batunon ang ining panghangkat nga maghinulso kag magbag-o agud nga ang Maayong Balita lubos nga makita sa aton adlaw-adlaw nga pagpangabuhi. Kag sa aton pagsalubong sang bag-o nga kaliwatan sang mga Kristiyano, matuod, nga ang kalipayan sang langit yari na sa aton kalibutan.

Gani ang Ginoo – sa tagsa-tagsa - liwat nagahangkat sa aton tanan, “Nag-abot na ang tion nga gintagna sang mga propeta sang una. Ang paghari sang Diyos malapit na gid. Gani maghinulsol kamo sa inyo mga sala kag magtuo sa Maayong Balita!”


by Joseph Sylvester Evidente Pampliega
cellphone no.: 0916-7911-959)