by Rev. Fr. Carlo M. Noquez
Nagtubo ako nga may madamo nga awtoridad sa akon palibot. Akon ginikanan, katigulangan, maestro kag maestra, mga pari kag mga superyor sa akon obra subong. Halin sang una, may lain ako nga pag-intiende sang awtoridad. Mga tawo nga ginakahadlukan, ginatuman sing wala sing pagpamangkot ukon pang-duha duha, nangin mga tawo nga indi ko kaisa matulok sing tadlong sang akon mga mata . Apang sa dalayon ko nga pagtan-aw sang kabuhi ni Kristo kag sang iban pa nga awtoridad, didto ko nahangpan nga ang mautod nga sahi sang awtoridad amo ang ehemplo ni Kristo.
Ang awtoridad ni Kristo nagikan sa iya kaangtanan sa Dios nga Amay, sa bagay nga ang ginapanudlo kag ginahambal niya indi lang iya kundi iya sang Amay nga amo ang matuod nga awtoridad. Ang iya pulong nagasanto sa iya buhat kay ini tanan suno sa kabubut-on sang Amay. Luyag sang Amay nga ang mga katawhan makabati kag makakita kung ano siya- isa ka awtoridad nga nagakabalaka, awtoridad nga nagadala sang kaayuhan, awtoridad nga nagagiya sa iya katawhan padulong sa kahilwayan kag kaluwasan. Ini nga pagpahayag ni Kristo sang Amay nagahangkat sa akon kag sa aton tanan nga magkabuhi nga may awtoridad nga nagasanto ang aton mga pulong kag buhat suno sa kabubut-on sang Amay, kag mangin sahi sang awtoridad kaangay sa ehemplo ni Kristo nga naga-alagad kag nagadala sang isigkatawo sa kaayuhan kag kaluwasan.
Ipangamuyo naton mga utod nga giyahan kita ni Kristo bilang mga awtoridad, ginikanan man ukon yara sa palangakuan, kaparian man ukon sa anuman nga gintugyanan sang posisyon sang pagdumala, nga mangin matuod nga mga awtoridad kaangay ni Kristo sa iya pulong kag buhat, sa iya padayon nga pagtuman kag pagpahayag sang kabubut-on sang Amay, sa pagdala sang maayong balita sa mga katawhan.
No comments:
Post a Comment